წარმოიდგინე მშვიდობის კოშკი

დედამიწას ერთი სული აქვსო, ოზიმ, კაცობრიობა მის წარწყმენდას როდის შეწყვიტავს. ლაბირინთშიაო ჩახვეული და ისტორია იმეორებს თავს.

მხოლოდ ომის სახელებია სხვადასხვა, შინაარსი იგივე: რელიგიები და საზღვრები. ადამიანი სურვილებისგან სურვილის დაკმაყოფილებით ვერ თავისუფლდება. აზარტში შედის და მერე საკუთარი  კომპლექსების გამო სამყაროს ეკიდება.

ზოგი ხალხი ელის ქრისტეს მოსვლას, ზოგი- მესიას, ზოგი – მუნთაზარს, ზოგი – მაიტრეის, სოშის, კალკა-ხვატარს. საბოლოო ჯამში, ყველა ერთია, რადგან დედამიწაზე არიან.

ადამიანებს ოცნებაც აქვთ. ოზიმ, ორი ჩვენთაგანი, უკეთეს დღეებზე რომ ოცნებობს, მე და ჯონი ვართო.

მანამდე, 70-იანებში ჯონმა წარმოიდგინა, რომ არ არსებობს სამოთხე და ჯოჯოხეთი. ჩვენს ირგვლივ მხოლოდ ზეცაა და   დღევანდელი დღისთვის ცხოვრობს ხალხი.

არ არსებობს მატერიალური საზღვრები და ქვეყნები. არაფრისთვის გიწევს მოკვდე ან მოკლა. არ არსებობს რელიგიები და ხალხებიც მშვიდად ცხოვრობენ. თუ დარღვეული ბალანსი ხალხს ჰარმონიული მდგომარეობა ჰგონია, არსებობენ მისნაირი მეოცნებებიც, რომლებიც სამყაროს ზემოდან და ერთიანობაში ხედავენ, სამყაროს, რომელსაც სიყვარული ატრიალებს.

წარმოიდგინა, რომ ეს არ არის უტოპია და მარტივია. მთავარია, მშვიდობას შანსი მისცე და იოცნებო. მარტო ოცნება ოცნებაა, ერთად ოცნება კი რეალობააო, იოკომ; იოკომ, რომელმაც ჯონ ლენონის მემორიალი ააგო ქმრის იუბილეზე და ”მშვიდობის კოშკი” უწოდა.

კოშკი მაღალია და სინათლისგან შედგება. მოწყობილია იმგვარად, რომ წელიწადში რამდენჯერმე ჩანს, ისიც მზის ჩასვლის შემდეგ. სიტყვები ”წარმოიდგინე მშვიდობა” 24 ენაზე წერია. მათ შორის ქართულადაც.

თვალი გაახილე ნიკოლას!

“Open your eyes Nicholas!”
Dream Theature

“გამოიღე ყურებიდან ბამბა
და თვალებზე ხელი აიფარე,
– დამთავრდა ომი.”
მე

თვალი გაახილე, ნიკოლას! –
ბრმავდებიან!
მინის ნამსხვრევებიანი თვალებითაც
აგრძელებენ ცხოვრებას ზოგჯერ.
შენ ამაყი ხარ.
ვეღარასდროს გინახავენ აწყლიანებულ
თვალებს დარდისგან.

თვალი გაახილე, ნიკოლას!

გვამები გაითვალე სამშვიდობომდე
რამდენი დარჩა.
მტრედთა ფეხები შევაგროვოთ
და ავტობუსებზე ვხატოთ.

თვალი გაახილე, ნიკოლას! –

უბრალოდ მოგენატრე!
ეს მე ვარ!

მე მხვეტავი ვარ
ომის,
საკუთარი გვამების და
გვამებისგან დარჩენილი
ნაწილაკების.
ბრძოლის მერე ვრჩები და ვგვი.
ფეხი ასწიე! –
ნაგავი ყრია.

თვალი გაახილე, ნიკოლას!

მოგეხვიე!
მოგახვიე მიწა ყელამდე.
არ გაინძრე,
ექიმს მოვიყვან.
დაგიზილე მიწისგან სახე
და სუდარად გადაგაფარე თმა!
ნაგავს გადავყრი და მოვალ!

თვალი გაახილე, ნიკოლას!
თუ რამეა, მე დაგიხუჭავ!